Sjå for deg påskedramaet sett med blikket til Maria Magdalena. Det har den svenske artisten Carola gjort, i eit syngespel som no snart blir gitt ut på plate.
– Dette er det viktigaste eg har gjort, det er eit kjært hjarteprosjekt for meg, har Carola tidlegare sagt til Vårt Land.
Carola har denne veka vore i Trondheim i høve Ski-VM. Den 11. oktober i Unity Arena på Fornebu held ho det som blir sagt å vere det einaste showet ho gjer i 2025, og den største konserten nokosinne. Men før den tid kjem ho altså ut med hjarteprosjektet sitt, Via Dolorosa - Maria Magdalenas kärlek, på Kirkelig Kulturverksted. Den første singelen frå plata, «Via Dolorosa», kjem ut allereie fredag 14. mars.
Dette er det viktigaste eg har gjort
— Carola Häggkvist, om Maria Magdalena-prosjektet
Rørt ved av Jesus
Carola hadde urpremiere på dette syngespelet på Olavsfest i 2022, med Vårt Land til stades blant publikum. I etterkant spurte vi henne i kva grad ho identifiserer seg med Maria Magdalena, den bibelske kvinna som var ein av Jesu nærmaste følgjesvennar.
– På eitt vis kjenner eg meg att i forvandlinga hennar. Eg er også blitt rørt ved av Jesus, sa Carola då.
Maria Magdalena er ofte sett på ei synderinne, gjerne prostituert, som blei reist opp at av Jesus. Bibelen fortel først og fremst om henne som ein av Jesu disiplar, og den som først møtte den oppstadne Kristus på 1. påskedag.
Den kjente artisten kjenner eg att i at Jesus såg Maria Magdalena og sa namnet hennar – Maria – utanfor den tomme grava.
Deltok på «Hver gang vi møtes»
Carola har sidan gjennombrotet i 16-årsalderen vore ein av Skandinavias mest omtalte personar. Når ho ser det nye syngespelet som det viktigaste ho har gjort, kjem det på toppen av ein omfattande karriere – Carola har gjort mykje. Nyleg kunne norske TV-sjåarar også følgje henne i det populære programmet «Hver gang vi møtes» på TV 2. Der tok ho med seg meddeltakarane sine i kyrkja på Kjerringøy.
Songane i syngespelet om Maria Magdalena kom til henne mens ho var i Jerusalem, og Erik Hillestad har «kledd» songane med tekstar i etterkant.
– Det er godt for meg som artist, og som eit kjent namn, å gå inn i rolla som forteljar. Eg kan ta på meg Maria Magdalenas klede, slik eg tidlegare har tatt på meg kleda til Maria, Jesu mor, sa Carola til Vårt Land, med referanse til dei to juleplatene ho tidlegare har spelt inn i Betlehem.
Lærer kjærleiken å kjenne
Carola trur Maria Magdalena er ein person vi alle kan identifisere oss med, både menn og kvinner. Sjølv er ho, som Maria, «drabbad» av Jesu kjærleik.
– Ein treng ikkje å vere «storsyndar» for å møte Jesus. Det handlar om å lære å kjenne kjærleiken, seier den svenske artisten.
---
Carola Häggkvist
- Svensk artist
- Fødd 1966
- Superstjerne sidan debuten på 1980-talet
- Var nyleg med på programmet «Hver gang vi møtes» på TV 2
- Snart aktuell med plate om Maria Magdalena på Kirkelig Kulturverksted. Plata Via Dolorosa - Maria Magdalenas kärlek kjem ut fredag 11. april
---
