Dette er ein leiar. Leiaren gir uttrykk for Vårt Lands syn. Sjefredaktør og politisk redaktør har ansvar for innhaldet.
Tysdag vart den russiske ambassadøren til Norge kalla inn på teppet av utanriksminister Anniken Huitfeldt (Ap). Det skjedde som følgje av den russiske annekteringa av dei fire ukrainske fylka Kherson, Zaporizjzja, Donetsk og Luhansk. «Vi støtter Ukrainas suverenitet, rett til å bestemme innanfor egne grenser og retten til å forsvare seg», uttalte den norske utanriksministeren.
Det er rett haldning, fordi den støttar opp om internasjonal lov og orden.
Musks private utanrikspolitikk
Fleire har likevel tatt til orde for ulike «fredsforslag» for å få slutt på den blodige krigen i Ukraina. Ein av dei var Tesla-grunnleggjar Elon Musk som måndag kveld på Twitter skreiv at Russland burde få store delar av Ukraina etter folkeavstemmingar i FN-regi, i tillegg til Krim som har vært russisk «siden 1783».
Slik går han med på premissane til Putin-regimet som har gjort seg skuldige i grov urett mot folkeretten i Ukraina. Russiske styrkar er sannsynlegvis skuldige i avskyelege krigsbrotsverk, og dei ansvarlege bør bli stilt for krigsforbrytardomstolen.
Derfor er det linja til utanriksminister Huitfeldt, og ikkje Elon Musk, det internasjonale samfunnet må følge i Ukraina
— Vårt Land
Musks tilnærming kan verke tilforlateleg. Ingen kan vel påstå at dei ikkje ønsker fred. Likevel er det ein fred som vil komme på overgriparens premissar. Dessutan er det ingen garanti for at Putin-regimet vil nøye seg med desse fire områda Ukraina. Dersom målet er å forsvare dei russisk-talande befolkningsgruppene utanfor Russland, vil fokuset raskt vende seg mot andre tidlegare Sovjet-republikkar – som Estland, Kasakhstan og Georgia.
Følg Huitfeldts linje
Putin og hans folk har vist at dei har tilnærma ingen respekt for internasjonal lov og orden. Trugselen om bruk av atomvåpen vil ikkje forsvinne med det første.
Derfor er det linja til utanriksminister Huitfeldt, og ikkje Elon Musk, den det internasjonale samfunnet må følgje i Ukraina. Landet må som alle andre land ha full rett til å bestemme innanfor eigne grenser, så lenge det skjer i tråd med internasjonale menneskerettsstandardar og folkeretten. Det er dermed få argument for at Russland bør få overta dei store landområda i Ukraina.
[ Allierte lover skarp respons etter at Nord-Korea avfyrte rakett mot Japan ]