«Vikaren frå himmelen» blei Isabella Arendt kalla i valkampen i 2019. Tre år seinare gjekk ho på dagen som partileiar og melde seg ut av Kristendemokraterne, KrFs danske søsterparti. KD blei skipa i 1970 med KrF som førebilete.
17. mai sende Arendt ut ei melding til nyhendebyrået Ritzau og forklarte kvifor hennar leiartid var over:
– Eg brenn for å gjere Danmark grønare, friare og meir nestekjærleg. Eg opplever at eg ikkje lenger har støtte, og tek konsekvensen av det, og har difor treft denne avgjerda.
Dermed måtte Kristendemokraterne igjen finne ein leiarvikar. Partiet slit på målingane. På dei siste ligg KD under ein prosent i oppslutning.
Høgt konfliktnivå
Isabella Arendt utdjupar sjokkavgangen i DR.dk:
- Det var eit høgt konfliktnivå over tid.
Konflikten handla om abortstandpunktet Til KD, og har rast lenge internt. Kristeligt-Dagblad skriv at då Arendt prøvde avslutte debatten med eit nyhendebrev til medlemmene om at KD går inn for retten til fri abort, truga nestleiar Marianne Karlsmose å gå frå vervet.
Striden har stått om KD passivt skal godta abort eller aktivt fremje retten til abort verda over.
Råd frå Kristeligt Dagblad
Isabella Arendts utmarsj frå KD har fått Kristeligt Dagblad til å gje partiet eit råd – på leiarplass:
«Kristendemokraterne hadde ein gong eit oppdrag. Nå er det å lukke og sløkke. Jo, det er i aller høgste grad bruk for eit kristent syn på politikk. Men det skal ikkje bli monopolisert av eit bestemt parti.»
[ Oslosenteret ramma av underslag og sponsorsvikt ]
Veljarane svikta
Det var ved folketingsvalet i 2019 at Isabella Arendt blei ei politisk stjerne. Partileiaren blei sjukmeldt. Dermed måtte nestleiar Arendt ta steget opp. Ho skapte entusiasme. Målingar viste at Kristendemokraterne på nytt kunne få sete i Folketinget.
Men på valdagen svikta veljarane KD.
Sperregrensa i Danmark er på to prosent. Kristendemokraterne enda på 1,7.
Det var eit høgt konfliktnivå over tid
— Isabella Arendt, avgått leiar i danske KD
---
Kristendemokraterne
- Etablert i 1970 som Kristeligt Folkeparti, endra namn i 2003.
- Fungerande partileiar er Marianne Karlsmose, som fram til 17. mai var nestleiar.
- Partiet har ikkje folkevalde i Folketinget.
---
Skipa som protestparti
Kristendemokraterne heitte fram til 2003 Kristeligt Folkeparti. Partiet blei skipa i 1970 som ein reaksjon mot folketingsvedtak om fri abort og lovleg porno.
Kristeligt Folkeparti kom inn i Folketinget i 1973 med sju mandat, og sat i nasjonalforsamlinga fram til 1994 - og i regjering frå 1982 til 1988, i den såkalla firkløverregjeringa. Merkesaker er familiepolitikk, miljøpolitikk, etiske spørsmål og abort.
Datt ut av Folketinget
Kristendemokraterne var ikkje representert i Folketinget i åra 1994–1998, og partiet kom igjen under sperregrensa ved valet i 2005, og dei seinare vala.
Rett nok hadde danske KD ein representant frå 2010 til 2011 grunna at eit folketingsmedlem melde overgang til KD frå Det Konservative Folkeparti.
