Terrortrusselnivået blei måndag høgna til nest øvste nivå, opplyste Politiets tryggingsteneste (PST).
Politiet rullar ut fleire sikringstiltak rundt det politidirektør Benedicte Bjørnland omtalar som «jødiske og israelske interesser».
I Oslo ligg Jødisk Museum og den eine av Norges to synagogar. Begge stader blir godt besøkt av skuleelevar gjennom året.
Det er grunn til å tru at skular som hadde planar om å vitje Jødisk Museum i haust let vere å komme
— Torill Torp-Holte, direktør
Skular blir redde
– Har skular meldt avbod etter at PST høgna trusselvurderinga måndag?
– Nei. Men det er grunn til å tru at skular som hadde planar om å vitje Jødisk Museum i haust let vere å komme, seier direktør Torill Torp-Holte til Vårt Land.
– Fordi dei blir redde?
– Ja.
– Kva tenkjer du som direktør om det?
– Slike vurderingar er forståelege, men ikkje ønskjelege.
Museumsdirektør Torp-Holte fortel at dei har røynsle med at skuleklasser blir borte når politiet går ut og fortel at dei forsterkar vakthaldet ved jødiske institusjonar grunna trusselvurderingar.
I fjor stifta opp mot 6.000 elevar og studentar kjennskap med Jødisk Museum i Oslo.
Opne dører for elevar i synagogen
Synagogen i Oslo tek i mot skuleklasser – og andre grupper – som ønskjer å vitje gudshuset samt få kunnskap om jødedom og jødisk liv i Norge.
Også her er dørene opne.
– Synagogen vil ta imot skuleklasser, som vanleg. Me har hatt høgna beredskap i eitt år, så elevar er framleis velkomne, fortel Ronen Bahar, styreleiar i Det Mosaiske Trossamfund, til Vårt Land.
Terroråtak i naboland
Bakgrunnen for at PST høgnar terrortrusselnivået til trinn fire av fem, opp frå moderat til høg, er opptrappinga av krigen i Midtausten samt åtak mot Israels ambassadar i København og Stockholm.
To personar er arresterte i Danmark, ein av dei har aktivitet knytt til Norge, fortel PST
Det er først og fremst trusselen mot jødiske og israelske mål som er skjerpa. Politiet er også særs merksame fordi det kjem fleire jødiske høgtider i oktober.
Synagogen vil ta imot skuleklasser, som vanleg. Me har hatt høgna beredskap i eitt år, så elevar er framleis velkomne
— Ronen Bahar, styreleiar Det Mosaiske Trossamfund
Søkte om støtte til tryggingstiltak
Jødisk museum har lenge kjempa for betre tryggleik. I desember sende museet ein søknad til Justisdepartementet der dei presenterte fysiske tiltak med ein samla prislapp på 4,5 millionar kroner, fortalde Vårt Land.
Museet vil betre kontrollen med kven som kjem inn i bygget, mellom anna med fysiske hindringar og kameraovervaking.
– Den utsette jødiske minoriteten har tidlegare fått støtte frå staten for å sikre samfunnshus, synagoge, barnehage og gamleheim, sa Rolf Golombek til Vårt Land. Han er styreleiar i Jødisk museum i Oslo.
Svarte nei, nei
Svaret frå departementet til justisminister Emilie Mehl (Sp) var nei:
«Det er pr. i dag ingen ordninger under Justis- og beredskapsdepartementet som kan benyttes til den type tiltak som etterspørres», skreiv dei i avslagsbrevet.
Jødisk museum klaga på avslaget og bad om eit møte med Mehl. Departementet sa nei.
I eit skriftleg svar til Stortinget opplyste Mehl at politiet i Oslo følgjer museet spesielt:
«Oslo politidistrikt har hatt et særlig fokus på å følge opp jøder som utsatt minoritet som følge av at trusselen mot jøder og jødiske mål er skjerpet. Politiet samarbeider nært med PST, og vurdering av sikkerhetssituasjonen rundt de jødiske interessene er i en kontinuerlig prosess.»
Lovar 77,3 millionar spreidd over fleire år
I statsbudsjettet for 2025 gjev regjeringa lovnad om 77,3 millionar kroner til Jødisk museum. Midla skal gå til restaurering den gamle synagogen som opphaveleg heldt til i dagens museumsbygg.
Men støtta kjem ikkje samla neste år. Løyvinga er på sju millionar neste år, «samt tilsagn om ytterligere 70,3 millioner kroner i senere budsjettår, slik at den samlede statlige medvirkningen blir 77,3 mill. kroner».
