Vårt Land har fått tilgang til ei liste med 78 namn på frimurarprestar. Dei er med i Frimurarordenens eksklusive presteskap, det sokalla Clericiet.
Dette er frimurarar som også er ordinerte prestar frå ulike kyrkjelydar, både i og utanfor Den norske kyrkja.
Lista viser medlemmer ved inngangen av 2024. Vårt Land har sjekka namna i opne kjelder og funne at minst 40 av dei 78 mennene er pensjonistar. Enten ved at dei blir omtala som pensjonistar, eller at dei er over 70 år, som er pensjonsalder for prestar.
Ein av mennene på lista døde i fjor. Eldste er 100 år.
Frimurar og sokneprest: – Eg var ung og nysgjerrig
– Eg opplever det ikkje som at det er noko forgubbing i Frimurarordenen. Eg kjenner til mange unge prestar som er med.
Det seier David André Tys. Han er mellom dei relativt unge frimurarprestane. 39-åringen jobbar til vanleg som sokneprest i Åsnes i Innlandet.
Interessa for brorskapen var vekt då han for 15 år sidan møtte ein frimurar i kyrkjelyden der han jobba tidlegare.
– Eg var ung og nysgjerrig. Frimurarordenen er ein urgammal måte å arbeida med seg sjølv.
Han angrar ikkje.
– Det er eit før og etter i livet. Når du blir teken opp som frimurar får du eit 3D-perspektiv på deg sjølv, du får sett deg sjølv frå ulike sider.
Snittalder på norske frimurarar er 65 år
Lista til Vårt Land er ikkje komplett. Den norske frimurarordenen har tidlegare anslått at det er rundt 100 frimurarprestar som er medlemmer.
14.263 personar er med i Frimurarordenen, ifølgje tal frå organisasjonen per januar 2024. Medlemmene er fordelt på over 1.000 ulike yrkestitlar og bur over heile landet.
Den eldste medlemmen var 102 år i starten av 2024, den yngste var 21 år. Ved opptak er snittalderen 43,3 år. Snittalder for medlemsmassen totalt er 65 år.
Er komne inn i kyrkjevarmen
Før jul fortalde Vårt Land om korleis Frimurarordenen har komme inn i kyrkjevarmen. Frå å vera kritisert for hemmeleghald og alternativ teologi, er brorskapen no med å arrangera gudstenester landet rundt.
Fungerande preses Stein Reinertsen fortalde at han veit om prestar som også er frimurarar og at frimurarprestar ikkje plikter å melda frå om dette til biskopane.
Også avtroppande katolsk biskop Bernt Eidsvig tek det med stor ro at katolikkar er frimurarar. Han har fortalt Vårt Land at han ikkje vil nekta nattverd til katolske frimurarar.
– Det er alltid vore slik at nokon skal takast
David André Tys seier han ikkje har diskutert frimurar-medlemskapen sin med biskop, og at han ikkje møter skepsis som frimurarprest.
Han legg til:
– Så har det alltid vore slik at nokon skal takast. Det storsamfunnet ikkje får innsyn i, skal øydeleggast.
– Du får sensitiv informasjon om folk som sjelesørgar. Folk kan kanskje vera redd for at du deler dette vidare når du er med i ein hemmeleg brorskap?
– Hemmeleghaldet i Frimurarordenen er knytt til rituala våre. Det er for at dei skal vera ei overrasking for nye medlemmer. Om ein får vita ting under tausheitsløfte, er det folkeskikk å ikkje dela det vidare, seier Tys.
---
Den norske frimurarordenen
- Ein samanslutning av nær 100 frimurarlosjar i Noreg.
- Feira i fjor 275-årsjubileum for stiftinga av den første losjen i Noreg. Sjølve ordenen vart stifta i 1891.
- For å kunne søka medlemskap, må ein vera mann, minst 21 år, tilrådd av tre medlemmer, vedkjenne seg den kristne tru og ha det som ordenen ser som eit godt omdømme.
- Blir leia av ein Stormester og rådet hans. Frode Olsbø vart utnemnd som ny Stormester november 2024.
- Har per 1. januar i fjor 14.263 medlemmar.
Kjelde: Store norske leksikon og Den norske frimurarorden
---
