På eitt år har Senterpartiet mista over 10 prosent av medlemmane sine. Det viser tal Vårt Land har henta inn.
Ved utgangen av fjoråret hadde partiet 15.783 betalande medlemmer. Det er nesten 2.000 færre medlemmer enn ved utgangen av 2023, då partiet hadde 17.703 medlemmer.
Tala inkluderer ikkje Senterungdommen, som førebels ikkje har klart medlemstal for 2024.
Rundt 200 nye senterpartistar i år
Men det finst også lysglimt for sentrumspartiet. Torsdag 30. januar gjekk Senterpartiet ut av regjering, etter striden rundt tre EU-direktiv.
Både hovudpartiet og ungdomspartiet melder om medlemsvekst til Vårt Land:
- I Senterpartiet er det komme til 168 medlemmer sidan 15. januar i år.
- Senterungdommen melder om 40 nye medlemmer sidan starten av 2025.
Senterungdommen er Senterpartiets ungdomsorganisasjon og er ein sjølvstendig organisasjon med separat medlemskap.
– Senterpartiet har fått over 200 nye medlemmar etter nyttår. Spesielt har tilstrøyminga av nye medlemmar til både partiet og Senterungdommen vore stor etter det vart klart at me ikkje kunne godta Aps krav om tilpassingar til EU på straumområdet, skriv generalsekretær i Senterpartiet Knut M. Olsen i ein e-post til Vårt Land.
Også Ap merker oppsving
Også Ap, som vart ståande åleine som regjeringsparti, har merka medlemsboost etter Sps exit. Ap har fått heile 1.200 nye medlemmar sidan starten av året, kunne NTB melda 7. februar.
Samstundes mista Ap 5.090 medlemmar i løpet av fjoråret. Tal NTB har henta inn, viser at medlemsmassen krympa frå 49.042 betalande medlemmar i 2023 til 43.952 i fjor.
Blødd medlemmar sidan «gullalderen»
I sommar skreiv Vårt Land om at Senterpartiet har mista medlemmar sidan toppåra frå 2019 til 2021. I denne «gullalderen» hadde Sp over 22.000 medlemmar. Desse tala inkluderte Senterungdommen.
Ved utgangen av 2023 var partiet tilbake til nivået før denne perioden. Då hadde Sp 19.253 betalande medlemmar, inkludert 1.550 i Senterungdommen.
