– Korleis er det mogleg, spør Esa Rautalinko.
Han er toppsjef i det finske våpenkonsernet Patria og styreleiar i delvis statseigde Nammo.
Trass tre år med krig i Ukraina er våpenproduksjon framleis svartelista av bankar og finansieringsinstitusjonar.
Finske Rautalinko rettar søkjelyset mot Den Nordiske Investeringsbank (NIB), ein nordisk-baltisk bank, statleg eigd.
NIBs fremste oppgåve i dag er å gje lån til finansiering av investeringsprosjekt og eksport som er av nordisk-baltisk interesse.
Rautalinko meiner gamle, hemmande retningsliner bør bli skrota.
Ein som kan gjere noko med akkurat det, var lenge generalsekretær i Nato. Norges finansminister Jens Stoltenberg (Ap) er guvernør i NIB.
Skal bruke over 1.600 milliardar
Tre år med fullskala krig i Ukraina, halvanna år med krig i Gaza og spenning i Asia har fått våpensmiene til å gløde.
Verdas 100 største våpenprodusentar selde militære tenester og våpen for 632 milliardar dollar i 2023 – eller godt over 6.000 milliardar kroner, viser fersk rapport.
Regjeringar Europa rundt tingar no store mengder våpen og ammunisjon, også Støre-regjeringa.
Mykje går som donasjonar til Ukrainas forsvarskrig.
Mykje går til å ruste opp nasjonale forsvar.
Fram til 2026 skal Norge bruke 1.624 milliardar kroner på det norske Forsvaret, har regjeringa og eit samla Storting blitt samde om.
Mektig forsvarsindustritopp
No går ein av Nordens mektigaste i våpenindustrien ut og rettar ei innstendig bøn til regjeringssjef Jonas Gahr Støre (Ap) og hans kollegaer i Norden og Baltikum:
Den Nordiske Investeringsbank (NIB) må få lov til å låne ut pengar til våpenprodusentar.
– Forsvarsindustrien blir framleis vurdert til å vere i same kategori som tobakk, alkohol og pornografi. Korleis er det mogleg etter tre år med krig? seier Esa Rautalinko til Hufvudstadsbladet.
Som konsernsjef i Finlands største våpenprodusent, Patria, er han også styreleiar i Norges nest største konsern i same bransje, Nammo.
Staten ved Næringsdepartementet eig halvparten av Nammo. Den andre halvparten er eigd av finske Patria.
Det konsernet er igjen eigd av den finske staten, 50,1 prosent og Norges største våpenprodusent, Kongsberg Gruppen, 49,9 prosent.
Staten ved Næringsdepartementet eig halvparten av Kongsberg Gruppen.
Jeg oppfordrer Stoltenberg til å se på dette
— Guri Melby, leiar Venstre
Norges nest største eigar
Rautalinkos peikar konkret Den europeiske investeringsbanken, eigd av EUs medlemsland – og Den Nordiske Investeringsbank, som er eigd av Norge, Sverige, Danmark, Finland, Island, Latvia, Litauen og Estland.
Begge bankar er politisk styrte av medlemslanda – og begge svartelister framleis våpenprodusentar.
Rautalinko kom med hjartesukket under konferansen Forsvarsindustrien i ei ny tid i Helsinki sist veke.
Norge er nest største eigar i NIB. Øvste styringsorgan i banken er guvernørane, som er dei åtte finansministrane i Norden og Baltikum. Leiande guvernør er finansminister Jens Stoltenberg (Ap), som i ti år var generalsekretær i NATO – og med sterkt opptatt av at medlemslanda måtte ruste opp.
NIB har i dag store utlån til prosjekt i det grøne skiftet, til kraftproduksjon, til kollektivinfrastruktur.
Venstres Melby ber Stoltenberg sjå på saka
Guri Melby, leiar i Venstre, seier til Vårt Land at Stoltenberg bør sjå på utlånsrammene til Den nordiske investeringsbank.
«Det er klart at det uansett må ligge noen prinsipper til bunn. Banken skal selvfølgelig ikke investere i selskaper som bryter menneskerettighetene eller som selger våpen til autoritære stater. Jeg oppfordrer Stoltenberg til å se på dette. Europa er langt unna å produsere nok ammunisjon for Ukraina og industrien trenger oppskalering», skriv ho i ein epost til avisa.
Melby peikar på at med «et ekspansjonistisk Russland som til og med kan ligge an til å få store seire i Ukraina, må vi kunne forsvare demokratiet og friheten vår. Vi kan ikke være naive. Når terrenget endrer seg, må vi politikere oppdatere kartet vårt».
Nei til våpen, porno og kasino
NIB har i dag retningsliner som forbyr finansiering av verksemder som produserer:
- Våpen og ammunisjon.
- Pornografi.
- Alkoholhaldige drikkevarer (unntatt øl og vin).
- Tobakk.
- Gambling, kasino og tilsvarande verksemder.
I fjor opna NIB for at han kan finansiere materiell og tenester knytte til forsvar – nye retningsliner blei sendt på høyring. Endringa opna ikkje for våpen og ammunisjon.
---
Den Nordiske Investeringsbank
- Etablert i 1975 av Danmark, Finland, Island, Sverige og Norge.
- Utvida med Estland, Latvia og Litauen i 2005.
- Sverige er største eigar, Norge nest størst.
- Forvaltningskapital: 98 milliardar kroner.
---
